កំពង់ធំ៖ ទីបំផុតរកឃើញសាកសពយុវជនម្នាក់ ក្នុងចំណោមយុវជនចំនួន ៣នាក់ដែលបានលង់ទឹកក្នុងអំឡុងពេលជិះទូកស្ទួចត្រីលេងនៅក្រោមស្ពានស្ទឹងសែន ស្ថិតក្នុងភូមិកំពង់ក្របៅ សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ កាលពីរសៀលថ្ងៃទី១៣ ខែវិច្ឆិកា ឆ្នាំ២០២២។
ក្នុងចំណោមយុវជនចំនួន ៣នាក់ គឺមានយុវជនចំនួន ២នាក់ត្រូវបានអ្នកនេសាទជួយសង្គ្រោះទាន់ពេលវេលា ប៉ុន្តែយុវជនម្នាក់ទៀតបានបាត់ខ្លួន រហូតដល់ល្ងាចម៉ោងជិត៧ ថ្ងៃទី១៤ ខែវិច្ឆិកា អាជ្ញាធរបានរកឃើញសាកសពយុវជនម្នាក់នោះនៅខាងកើតស្ពានចាស់ស្ទឹងសែនប្រហែល ៣០ម៉ែត្រពីកន្លែងកើតហេតុ ដែលសភាពសពគឺហើមស្អុយទៅហើយ។
បើតាមការផ្សាយព័ត៌មានរបស់អធិការដ្ឋាននគរបាលក្រុងស្ទឹងសែន ជនរងគ្រោះនោះមានអាយុ ៣០ឆ្នាំ មានមុខរបរជាជាងបិទស្កុតម៉ូតូ ដែលមានទីលំនៅភូមិស្ទឹងសែន សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ៕
